Málið er ekki flókið. Nýsjálenski leikmaðurinn Adrian Webster náði ekki að heilla Gunnar Oddsson og félaga nóg á þeim 3 æfingum sem hann mætti á hjá Þrótti.  Hvað kappinn hyggst gera í framhaldinu er okkur ekki kunnugt um. Stjórn knattspyrnudeildar og þjálfarateymi hefur samt hug á að styrkja hópinn fyrir baráttuna sem framundan er enda óásættanlegt að vera með 5 stig og verma botnsætið. Núverandi leikmannahópur hefur verið saman í 8 mánuði við æfingar og leiki og því miður hefur þessi mannskapur ekki skilað betri árangri en raun ber vitni. Það ætti því ekki að koma neinum á óvart, hvorki stuðningsmönnum né leikmönnum að menn leiti leiða til að styrka hópinn.  Við stöndum við bakið á hlutaðeigandi í málinu en viljum samt ekki fá neina pappakassa í Dalinn.

Útsendarar Köttarasíðunnar höfðu spurnir af erlendum knattspyrnumanni á æfingu hjá meistaraflokki Þróttar í gærdag. Við heyrðum í Finnboga Hilmarssyni sem sagði aðspurður: 
"Maðurinn heitir Adrian Webster og er til reynslu hjá okkur út þessa viku. Ef hann stendur undir væntingum þá standa vonir til að hann verði kominn í Þróttarabúninginn innan skamms".
Skv. okkar upplýsingum er Adrian Webster með nýsjálenskt ríkisfang. Hann hefur spilað nokkra landsleiki fyrir Nýja Sjáland og hefur síðustu árin leikið í efstu deild í Ástralíu og Finnlandi.  Á sínum yngri árum fór hann í gegnum unglingastarfið hjá Charlton Athletic í Englandi.  Kappinn þessi ku geta leyst ýmsar stöður, framarlega á vellinum.
Við þetta má bæta að Eysteinn P. Lárusson, fyrrum fyrirliði Þróttar, hefur hafið æfingar á nýju  auk þess sem Oddur Ingi og Þórður Hreiðarsson verða jafnvel tilbúnir fyrir næsta leik sem er gegn Fram mánudaginn 13.júlí.

Þróttur - Fylkir á Valbjarnarvelli sunnudaginn 28. júní kl 19:15

Eftir erfiða útileikjahrinu gegn toppliðum síðasta tímabils er komið að heimaleik. Að mörgu leyti má segja að Þróttarar séu að heimsækja okkur því Fylkisliðið hefur í gegnum tíðina verið skipað fleiri uppöldum Þrótturum en Árbæingum. Það hefur hins vegar breyst í sumar. Óli Þórðar hefur mikið verið að nýta unga heimamenn sem virkaði mjög vel í upphafi móts. Það hefur samt eitthvað hallað undan fæti hjá liðinu og það aðeins fengið eitt stig úr síðustu þremur leikjum. Í millitíðinni komust þeir samt í 16-liða úrslit í bikarkeppninni eftir fáránlegan sigur á Stjörnunni.

Þróttarar hafa tapað síðustu tveimur leikjum og eru komnir í ansi erfiða stöðu. Baráttan við botninn er mikil og stutt er á milli liða. Takist Þrótturum að sigra á morgun er líklegt að þeir komist upp úr fallsæti. Tapi þeir hins vegar er staðan orðin ansi svört. Við lítum samt ekkert í þá áttina og ætlum öll að styðja við bakið á strákunum og sjá til þess að þeir klári þennan leik.

Þróttarar mættu galvaskir til Keflavíkur í kvöld og stefnan var að fara allavega með 3 stig í burtu.  Aðstæður til knattspyrnuiðkunar voru frábærar, blankalogn, örlítið blautt gras og skýjað.  Þróttarar stilltu upp nokkuð hefðbundnu liði í kvöld með Sindra í markinu, Birkir og Jón Ragnar í bakvörðum og Hauk og Kristján Ómar í miðri vörninni.  Inni á miðjunni voru Hallur og Dennis og Rabbi fyrir framan þá.  Maggi Lú og Morten skiptu köntunum á milli sín og Hjössi var fremsti maður. 

Leikurinn byrjaði rólega og fátt markvert gerðist á fyrstu mínútunum.  Þróttarar voru ekki að falla of langt til baka sem var gaman að sjá.  Þeir pressuðu Keflvíkinga ágætlega og létu finna vel fyrir sér inni á miðjunni.  Eftir rúmlega korters leik slapp Hjössi í gegnum vörn Keflvíkinga en lét Danska markvörðinn þeirra verja frá sér þrátt fyrir að hafa góðan tíma til að klára færið.